பழமையைப் புதுமையாக்கிய நிகழ்ச்சி. இசையமைக்கப்பட்ட திரை இசைகளையே மீண்டும் மீண்டும் நிகழ்த்திக் கொண்டிருக்காமல் சங்கப்பாடல்கள், பாரதி, பாரதிதாசன், திருக்குறள் பாடல்களைத் தேர்ந்தெடுத்து, அதற்கு நல்ல இசையையும் அமைத்து, இனிய குரலில் குழுவினராகப் பாடச் செய்வது இசையுலகில் வரவேற்பிற்குரியது.

கேட்பவர்களுக்கு புத்துணர்ச்சியும், சங்கத்தமிழில் ஈடுபாடும் ஏற்படும். நிகழ்ச்சியின் 1 1/2 மணிநேரமும் நம் மனம் ஒருமையுடன் அந்த இசை நிகழ்ச்சியிலேயே ஒன்றில் நிற்கச் செய்வது ஜேம்ஸ் வசந்தன் குழுவினரின் வெற்றி.

இசை ஆர்வலர் - திரு. சுப்பையா

திருச்சிராப்பள்ளி மருத்துவமன்ற பொங்கல் விழாவில் திரு ஜேம்ஸ் வசந்தன் பல ஆண்டுகளுக்கு முன் கண்ட அதே இளமையும், புன்சிரிப்புமாய் அன்போடு உரையாடிய அவரது ஆளுமை அன்றைய தமிழ் இசை நிகழ்வில் மலர்ந்து மணந்தது. ஆண்களும் பெண்களுமாய் இளைஞர்கள் சூழ, தமிழை அரங்கெல்லாம் பரவச்செய்த அவரது மொழி வல்லமை இணையற்றது. சங்ககாலத்தில் தொடங்கி இன்று வரையிலான தமிழ்ப்பதிவுகளை உள்ளத்தைத் தொடும் இசையமைப்பில் வழங்கிய அவரது குழு மருத்துவர்களை ஒன்றுபோல் மயக்கியது.

இப்படியெல்லாமும் இந்தப் பாடல்களை உணர்வு பொங்கப் பாடமுடியுமா என்பதுபோல் ஒவ்வொன்றும் தேனிசைதான். கைகள் தாளத்திலும், இதழ்கள் பாடல் வரிகளிலும் இயங்க, பார்வையாளர்களின் விழிகள் இசைக்குழுவின் இளக்கமும் இனிமையுமான மென்னகையில் மயக்கம் கொண்டன.

ஒன்றரை மணி நேரம் உள்ளத்தைக் கட்டிப்போட்ட இசை. பழந்தமிழ்ப் பாடல்கள் வசந்தனின் இசையில் புதிய முகங்களைக் காட்டின. அரங்கு மகிழ்ந்து நிறைந்தது. வாழ்க ஜேம்ஸ் வசந்தனும் அவரது இசை இளைஞர்களும்.

மருத்துவர் - இரா. கலைக்கோவன்

'தமிழ் ஓசை' - இனிமையான ஓசையில் செந்தமிழின் ஊற்று.

முனைவர் / துறைத் தலைவர் / கணினி அறிவியல் மற்றும் பொறியியல் ஆக்ஸ்போர்ட் பொறியியல் கல்லூரி - சங்கீதா செந்தில்குமார்

இசையமைப்பாளர், ஊடகவியலாளர் ஜேம்ஸ் வசந்தன் அவர்கள் உருவாக்கியுள்ள "தமிழ் ஓசை" எனும் இசைக்குழுவினரின் சேர்ந்திசை நிகழ்ச்சியை அண்மையில் திருப்பூரில் கேட்கும் வாய்ப்பு நேர்ந்தது. உள்ளபடியே உள்ளத்தில் சிலிர்ப்பை உண்டாக்கும் அரிய அனுபவமாக அந்நிகழ்வு திகழ்ந்தது.

சங்கத்தமிழ்ப்ப்பாடல்கள், புரட்சிக் கவிஞர் பாரதிதாசன் பாடல்கள், புதுமைக் கவிஞர் பாரதியின் பாடல்கள் எனப் பல்வகைத் தமிழ்ப் பாடல்களை இளைய தலைமுறையினரையும் ஈர்க்கத் தக்க வகையில் பாட வைத்து, தனது குழுவினரின் சேர்ந்திசையால் மலைக்க வைத்தார் ஜேம்ஸ் வசந்தன். பாரதியின் "செந்தமிழ் நாடென்னும் போதினிலே" எனும் பாடலைப் பல்வேறு வகையான இசையில் பாடிப் பார்வையாளர்களின் கவனத்தை ஈர்த்தது இவரது இசைக்குழு.

இக்குழுவில் உள்ள இளம் பாடகர்கள் அனைவரும் தகவல் தொழில்நுட்பத் துறையில் பணியாற்றுபவர்கள். அவர்கள் வழியே தமிழைப் பாடக் கேட்டது, இனிமையை மேலும் கூட்டியது.

தமிழிசையின் புதிய பரிமாணமாகத் திகழும் இம்முயற்சி, தமிழ் கூர் நல்லுலகெங்கும் பரவ வேண்டும். இப்படிப்பட்ட முயற்சி, காட்டில் காய்ந்த நிலாவாக, கடலில் பெய்த மழையாகக் கவனம் பெறாமல் போய்விடக் கூடாது. தமிழக மக்கள் இந்தப் புதுமையான முன்னெடுப்பை உச்சி முகர்ந்து வாழ்த்தி வரவேற்க வேண்டும். ஜேம்ஸ் வசந்தனின் தமிழ்ப்பணிக்கு உறுதுணையாக நிற்க வேண்டும்.

மாநிலத் தலைவர், மக்கள் சிவில் உரிமைக் கழகம் - கண. குறிஞ்சி

வள்ளுவர், பாரதி, கணியன் பூங்குன்றனார் என்று தமிழ் இலக்கிய வீதியில் முன்னும் பின்னுமாக பயணித்து, பல நூற்றாண்டுகளுக்கான தூரத்தை மனப்பூர்வமாக அனுபவித்துக் கடந்து வருவதற்கு எத்தனை காலம் தேவைப்படும்?

ஒரு சில மணி நேரங்கள் போதும் - ஜேம்ஸ் வசந்தனின் ‘தமிழ் ஓசை’ சேர்ந்திசைக் குழுவிடம் நம்மை ஒப்புவித்து விட்டால்!

சங்கத் தமிழா? அதைப் படித்துப் புரிந்து கொள்வதற்கு நமக்கேது தெம்பு என்று இதுவரை ஒதுங்கி கிடந்த எவரும் இந்த சேர்ந்திசை நிகழ்ச்சியை ஒருமுறை ரசித்துவிட்டால் போதும்... ‘இத்தனை எளிதா? இவ்வளவு இனிதா என் தாய்த் தமிழின் பொக்கிஷப் பாடல்கள்!’ என்று மலைப்பும் மகிழ்ச்சியுமாக சிலிர்த்து நிற்பது உறுதி.

சாஸ்திரிய சங்கீதத்திலும், மேற்கத்திய பாணியிலும், கானா வடிவத்திலுமாக ஜேம்ஸ் வசந்தன் அலங்காரம் செய்து கொடுக்கும் பழந்தமிழ் பாடல்களுக்குள் தன்னை இழக்க பெரிய தமிழ் ஞானம் கூடத் தேவையில்லை. இசையில் தன்னைப் பறிகொடுக்கும் பக்குவம் இருந்தாலே போதும்.

முற்றிலும் ஒரு புது முயற்சி... இளமையும் புதுமையும் ததும்பும் நிகழ்ச்சி.

உற்சாக வாழ்த்துக்கள் - தமிழ் ஓசை குழுவினருக்கு.

ஆசிரியர், ‘இந்து தமிழ் திசை’ நாளிதழ் - கே.அசோகன்